لوړو زده کړو وزارت د نصاب ریاست لخوا راغلي پلاوي د کابل ښوونې او روزنې پوهنتون لېسانس، ماسټرۍ او دوکتورا برنامو د نصاب څېړلو چارې پیل کړې!

چهارشنبې ورځ د ٢٤/١١/١٤٠٣ هـ.ش چې له ١٣/٨/١٤٤٦ هـ.ق نېټې سره سمون لري د لوړو زده کړو وزارت د نصاب ریاست لخوا راغلي پلاوي د کابل ښوونې او روزنې پوهنتون لېسانس، ماسټرۍ او دوکتورا برنامو د نصاب څېړلو چارې پیل کړې.

مقدماتي غونډه د قرانکریم د څو مبارکو آیاتونو په تلاوت سره د پوهنتون معاونینو، پوهنځیو رئیسانو او لوړو زده کړو وزارت د نصاب ریاست پلاوو په ګډون پیل شوه.

لومړۍ، کابل ښوونې او روزنې پوهنتون علمي چارو مرستیال ښاغلي پوهنمل دوکتور قدرت الله "عمرخیل" د غونډې ګډوونکونکو ته د ښه راغلاست ترڅنګ، راغلو پلاوو ته د پوهنځیو رئیسانو پېژندګلوي وکړه، زیاته یې کړه: د پوهنځیو مسؤولین به له تاسو سره د نصاب څېړلو برخه کې هر ډول مرسته وکړي او هیله لرو چې د نصاب څېړلو چارې په ښه توګه پرمخ ولاړې شي.

وروسته، د لوړو زده کړو وزارت د نصاب ریاست څخه راغلو پلاوو د راتګ موخه، هدف او د نصاب څېړلو ترتیب او تنظیم اړوند هراړخیزې خبرې وکړې.

د یادولو وړ ده چې ٤٠ کسیزه راغلۍ پلاوی به څو ورځې پوهنتون کې پاتې شي او د کابل ښوونې او روزنې پوهنتون لېسانس، ماسټرۍ او دوکتورا برنامو نصاب به له نږدې وڅېړي.

غونډه د دعایې په ویلو سره پای ته ورسېده.