د کابل ښوونې او روزنې پوهنتون علمي شورا غونډه ترسره شوه.

دوشنبې ورځ د ( 1445/3/2) هـ.ق چې له (1402/6/27) هـ.ش نېټې سره سمون لري د کابل ښوونې او روزنې پوهنتون علمي شورا غونډه د پوهنتون معاونینو، پوهنځیو رئیسانو او استادانو په ګډون کې ترسره شوه.

غونډه د قرانکریم د څو مبارکو آیاتونو په تلاوت سره پیل شوه.

په پیل کې د کابل ښوونې او روزنې پوهنتون علمي چارو مرستیال ښاغلي پوهاند دوکتور جمشېد خان "رشیدي" په خپلو خبرو کې د علمی شورا غړو ته د ښه راغلاست ترڅنګ د لوړو زده کړو وزارت رهبرۍ شورا پرېکړو اړوند مکمل معلومات د علمي شورا غړو سره شریک کړل، همدارنګه یې د استادانو کادري بستونو امتحانونو، د ستراتیژیکو پلانونو غونډې دایرېدو، (٪۲۰) شل فیصده امتحانونو او د لوړو زده کړو وزارت لخوا د دیني عالمانو اصلاحي - دیني درسونو کې د محصلینو ګډون اړوند موضوع ګانو بحث او خبرې وکړې.

وروسته د پوهنتون علمي شورا غړو د لاندې موضوع ګانو اړوند پرېکړې وکړې:

د کلنۍ څارنې او دوریي راپورونو تأییدي، د بدني روزنې او ورزشي علومو پوهنځي د ستراتیژیکو پلانونو تأییدي، د مرکز او ولایاتو د نویو ګمارل شوو استادانو د ترفېع او انفکاک دوسیو څېړلو اړوند بحث او خبرې وشوې چې د علمي شورا لخوا نوموړې پرېکړې تأیید شوې.

غونډه د دعایې په ویلو سره پای ته ورسېده.