کابل ښوونې او روزنې پوهنتون علمي شورا غونډه ترسره شوه!
دوشنبې ورځ د ٢٩/١٠/١٤٠٤ ه.ش چې له ٢٩/٧/١٤٤٧ ه.ق نېټې سره سمون لري د کابل ښوونې او روزنې پوهنتون علمي شورا غونډه د پوهنتون رئیس، مرستیالانو، پوهنځیو رئیسانو او علمي شورا غړو په ګډون ترسره شوه.
غونډه د قران کریم د څو مبارکو آیاتونو په تلاوت سره پیل شوه.
په پیل کې د کابل ښوونې او روزنې پوهنتون رئیس ښاغلي مولوي عبدالحکیم"حمدي" د غونډې پیل وینا وکړه، ویې ویل: نننۍ علمي شورا غونډه زموږ د علمي، تحصیلي او څېړنیز بهیر د ارزونې، پیاوړتیا او سمون لپاره یو مهم فرصت دی. پوهنتون یوازې د درس او تدریس ځای نه دی، بلکې د فکر، څېړنې، نوښت او علمي مسؤلیت مرکز دی. زموږ مسؤلیت دا دی چې علم د ټولنې د اړتیاوو له واقعیتونو سره وتړو او د علم له لارې د امت او وطن خدمت وکړو. علمي شورا د پوهنتون فکري بڼست ده. هره پرېکړه چې دلته کېږي، باید پر علمي معیارونو، څېړنې، انصاف او امانت ولاړه وي. موږ مکلف یو چې نصابونه د وخت له غوښتنو سره عیار کړو، څېړنه پیاوړې کړو، علمي کیفیت لوړ وساتو او استادانو او محصلینو ته سالم علمي چاپېریال برابر کړو. زه له درنو استادانو مننه کوم چې له ټولو ستونزو سره ـ سره، د علم مشعل بل ساتي، خپل علم، تجربه او وخت د محصلینو د روزنې لپاره وقف کوي. همدارنګه د له علمي شورا له غړو تمه لرم چې د نصاب، څېړنې، ارزونې او علمي پرمختګ په برخه کې خپل رول لا پیاوړی کړي.
د غونډې په جریان کې د پوهنتون علمي شورا غړو له لوري ( د نه ګونو پوهنځیو د درېیمې ربعې علمیاتي پلان تأییدي، محصلانو چارو معاونیت اړوند د ١٤٠٤ کال درېیمې ربعې ګزارش تأییدي، د نصاب او استراتیژیک پلان د ارزونې کميټو ګزارش تأییدي، د څېړنې پالیسی تأییدي، د عوت او ارشاد آمریت ١٤٠٤ کال اولې، دویمې او درېیمې ربعو ګزارش تأییدی او نورو)موضوعاتو اړوند بحث او خبرې وشوې.
