د افغانستان ښوونیزو او لوړو زده کړو پیاوړتیا ملي کنفرانس پای ته ورسېده!
پنجشنبې ورځ ۱۲/٧/۱۴۴۵ ه.ق چې له ۵/١١/١٤٠٢ ه.ش نېټې سره سمون لري د افغانستان ښوونیزو او لوړو زده کړو پیاوړتیا ملي کنفرانس د لوړو زده کړو وزارت علمي چارو معین، کابل ښوونې او روزنې پوهنتون رئیس، پوهنې وزارت معیینانو او رئیسانو، د پوهنتونونو رئیسانو، پوهنتونو معاونینو او استادانو، کابل ښوونې او روزنې پوهنتون معاونینو او استادانو په ګډون پای ته ورسېد.
کنفرانس د قرآنکریم د څو مبارکو آیاتونو په تلاوت سره پیل شو.
لومړی، د کابل ښوونې او روزنې پوهنتون رئیس ښاغلي شیخ الحدیث سید بشیر آغا "هاشمي" د ملي کنفرانس په بریالی توګه پای ته رسېدو اړوند خوښي څرګنده کړه، زیاته یې کړه د یاد کنفرانس د ټولو مادو په پلي کولو به د افغانستان ښوونیز او لوړو زده کړو بنسټونه لا پیاوړي شي او راتلونکي کال کې یې د نورو علمي کنفرانسونو د دایرېدو خبر ورکړ.
وروسته، د لوړو زده کړو علمي چارو معین ښاغلي دوکتور لطف الله "خیرخوا" د کابل ښوونې او روزنې پوهنتون له رهبرۍ څخه مننه وکړه، چې یاد ملي کنفرانس یې دایر کړ، زیاته یې کړه: د داسې ملي او علمي کنفرانسونو دایرېدل د هېواد په تحصیلي بنسټونو کې خورا ارزښت لري او د مرکز او ولایتو له استادانو څخه یې وغوښتل چې خپلو تحقیقاتو ته دوام ورکړي ترڅو خپل هېواد او هېواد والو ته د خدمت جوګه وګرزي.
د کنفرانس د دویمې ورځې په جریان کې (١٠) تنو استادانو خپلې مقالې ارايه کړې.
د یادولو وړ ده چې کنفرانس د تندیسونو او تصدیق پاڼو په ورکړې سره پای ته ورسېد.
