د سلواغې ۱۴مه_ لوړو زده کړو وزارت
لوړو زده کړو وزارت کې د ډاکتر عباس بصیر تر مشرۍ لاندې د رهبرۍ غړو غونډه وکړه، په غونډه کې يې په مشخصو مسایلو بحث وکړ او لازم تصمیمونه يې ونیول.
د غونډې په پیل کې د لوړو زده کړو وزیر عباس بصیر د اسلامي نړیوال پوهنتون د جوړولو پروسې د چټکتیا او د دولت د لوړ مقام د لارښوونو په اړه يې توضیحات ورکړل، وزیر عباس بصير وویل په دې اړه د لوړو زده کړو وزارت په ګډون د څو ادارو ګډه کمېټه جوړه شوې ده چې مشري يې د بهرنیو چارو وزارت په غاړه ده او په هېواد کې د جوړېدونکي نړیوال اسلامي پوهنتون د جوړولو د پروسې په اړه به کار کوي.
ورپسې د لوړو زده کړو وزارت علمي معین پوهنمل عبدالتواب بالا کرزي د یاد نړیوال اسلامي پوهنتون په اړه چې په ننګرهار ولایت کې جوړېږي؛ هر اړخیز معلومات ورکړل او د ترسره شوو کړنو، ستونزو او خنډونو په اړه يې د غونډې ګډونوالو ته تفصیلي څرګندونې وکړې، له تخنیکي بحثونو وروسته پرېکړه وشوه چې د دې موضوع په اړه مشخصه کمېټه جوړه شي.
همداراز د لوړو زده کړو وزارت د داخلي تفتیش ريیس د عالي تفتیش د موندنو او سپارښتنو په اړه پر جوړ شوي عملیاتي او تطبیقي پلان خبرې وکړې او د خصوصي تحصیلي بنسټونو په اړه يې د ولسمشر د حکم د پلي کېدو معلومات ورکړل چې له بحث وروسته د یاد شوی پلان په پرانسیپ کې د تایید وړ وګرځيد.
په عین حال کې د جګړه ځپلو ولایتونو د بې وزله ځوانانو له پاره په خصوصي تحصیلي بنسټونو کې د وړیا زده کړو د زمینې برابرولو په اړه بحث او لازمې پرېکړې وشوې، همداراز د لوړو زده کړو وزیر د مرکزي ادارو ټولو ريیسانو ته لارښوونه وکړه چې د مراجعینو ستونزې واوړي او د اسنادو د طي کولو پروسې پړاوونه چټک کړي.
