کابل ښوونې او روزنې پوهنتون د علمي چارو مرستیال د استراتیژیک کمېټې له غړو سره ناسته ترسره کړه!
دوشنبې په ورځ د ٨/٧/١٤٤٧ ه.ق. چې له ٨/١٠/١٤٠٤ ه.ش نېټې سره سمون لري د کابل ښوونې او روزنې پوهنتون د علمي چارو مرستیال د استراتیژیک کمېټې له غړو سره ناسته ترسره کړه.
یاده ناسته د ۱۴۰۴ هـ ش کال د درېیمې ربعې د عملیاتي پلان د تطبیق څرنګوالي او همدارنګه د پوهنتون رسمي ویبسایټ ته د استراتیژیک پلان د خلاصې د اضافه کولو په موخه جوړه شوې وه.
غونډه د قرانکریم د څو مبارکو آیاتونو په تلاوت سره پیل شوه.
په ناسته کې د عملیاتي پلان د تطبیق پر مهمو مرحلو، د وختبندۍ پر مراعت، د مسؤلیتونو پر روښانتیا او د تطبیق پر وړاندې د شته ننګونو او حللارو هر اړخیز بحث وشو. همدارنګه پرېکړه وشوه چې د پوهنتون د شفافیت او معلوماتو ته د لاسرسي د پیاوړتیا په موخه د استراتیژیک پلان لنډه او واضح خلاصه د پوهنتون په ویبسایټ کې خپره شي.
د ناستې په پای کې د علمي چارو مرستیال ښاغلي مولوي احسان الله"ناصح" وویل: ټاکل شوی پلاوی به د پوهنتون تولو اداراتو ته ورشي او د ١٤٠٤ کال درېیمې ربعې د عملیاتي پلان تطبیق به له نږدې وڅاري او د استراتیژیک کمېټې له غړو یې وغوښتل چې د ټاکل شویو موخو د لا ښه تطبیق لپاره خپل مسوولیتونه په همغږۍ، ژمنتیا او پر وخت ترسره کړي، تر څو پوهنتون وکولای شي ټاکل شوي ستراتیژیک اهداف په بریالیتوب سره ترلاسه کړي.
غونډه د دعایې په ویلو سره پای ته ورسېده.
