کابل ښوونې او روزنې پوهنتون د تربیتي او مسلکي علومو او بدني روزنې او ورزشي علومو پوهنځیو نويو کامیاب شویو محصلینو ته د اړونده پوهنځیو د پېژندنې غونډه ترسره کړه!

 پنجشنبې ورځ د ١١/٣/١٤٤٧ ه.ق. چې له ١٣/٦/١٤٠٤ ه.ش. نېټې سره سمون لري د کابل ښوونې او روزنې پوهنتون د عبدالرحمن بن سمرة د غونډو عمومي تالار کې د کابل ښوونې او روزنې پوهنتون د تربیتي او مسلکي علومو او بدني روزنې او ورزشي علومو پوهنځیو نويو کامیاب شویو محصلینو ته د اړونده پوهنځیو د پېژندګلوۍ او اړونده امکاناتو غونډه ترسره شوه.

په یاده غونډه کې د محصلانو چارو مرستیال، د یادو پوهنځیو رئیسانو، اداري آمرینو، استادانو او محصلینو ګډون درلود.

لومړۍ، د کابل ښوونې او روزنې پوهنتون محصلانو چارو مرستیال ښاغلي مولوي رحمان ګل"وثیق" د غونډې پیل وینا وکړه، محصلینو ته یې د مبارکۍ ترڅنګ  د نېکو اخلاقو، مسؤلیتونو، وخت ارزښت او په سمه توګه د درسي بهیر مخته وړلو اړوند هراړخیزې خبرې وکړې.

وروسته، د محصلینو خدمتونو او همغږۍ آمر شاغلي انجینر خان آغا"خبیب" محصلینو ته د مبارکۍ ترڅنګ یې د مسلکي زده کړو، د عصری زده کړو تر څنګ د دیني زده کړو، له کتابتون او لابرتوارو څخه د ګټه اخیستلو او د پوهنتون اصولو او قوانینو مطابق د درسونو مخته وړلو اړوند اړینې سپارېښتنې وکړې.

د غونډې په جریان کې، په ترتیب سره د تربیتي او مسلکي علومو او بدني روزنې او ورزشي علومو پوهنځیو رئیسانو، نويو کامیاب شویو محصلینو ته د ښه راغلاست ترڅنک د پوهنځیو تشکیل، استادانو، اداري کارمندانو، پوهنځیو اهدافو، درسي میتودونو، تعلیمي کال، سمسټرونو شمېر، ازموینو، د کړیډت سیسټم لایحه او درسي ټایمونو اړوند، نویو کامیاب شویو محصلینو سره معلومات شریک کړل.

غونډه د دعایې په ویلو سره پای ته ورسیده.