د لوړو زده کړو وزارت د نشراتو، اطلاعاتو او عامه اړیکو ریاست د مرکز او ولایاتو تحصیلي بنسټونو د نشراتو مسؤولینو ته د ظرفیت لوړونې دوه ورځنی ورکشاپ پای ته ورسېد!
دوشنبې ورځ ۱۰/۲/۱۴۴۵ هــ ق نېټه د لوړو زده کړو وزارت د نشراتو ریاست د مرکز او ولایاتو پوهنتونونو نشراتو مسؤولینو ته د کابل پوهنتون د تمیم انصاري په تالار کې د ظرفیت لوړونې، چارو همغږۍ او فکري روزنې تر سرلیک لاندې دوه ورځنی ورکشاپ د لوړو زده کړو وزارت سرپرست وزیر، علمي معین، د ا.ا.ا مرستیال ویاند، د باختر آژانس رئيس، د نشراتو رئیس، د کابل پوهنتون استادانو، د مرکز او ولایاتو پوهنتونونو نشراتو مسؤولینو په ګډون کې پيل کړ.
یاد ورکشاپ د قرآنکریم د څو مبارکو آیتونو په تلاوت سره پیل شو.
لومړی د لوړو زده کړو وزارت د نشراتو، اطلاعاتو او عامه اړیکو رئیس ښاغلي قاري محمد سلیمان “شریفي” د غونډې ګډونکوونکو ته د ښه راغلاست ترڅنګ د ورکشاپ د ارزښت او اهمیت اړوند معلومات ورکړل او زیاته یې کړه چې د دې ورکشاپ په پای ته رسېدو سره به د نشراتو مسؤولین له ډېرو تجربو برخمن شي.
ورپسې د لوړو زده کړو وزارت علمي معین دوکتور لطف الله "خیر خواه" په هېواد کې د مطبوعاتو د ارزښت او اهمیت په اړه هر اړخیز معلومات ورکړل او د نشراتو مسؤولینو ته یې د معلوماتو د حقیقت او اعتبار په اړه اړینې لارښوونې وکړې
همدارنګه د کابل پوهنتون د ژورنالېزم پوهنځی استادانو او اړونده مسؤلینو "د ویډیوګرافۍ، د خبر معیارونو او ارزښتونو، په نني عصر کې د رسنیو اهمیت، د نشراتي فعالیتونو په برخه کې اړینو سپارښتنو، د تحصیلي بنسټونو د نشراتو تخنیکي ستونزو او حل لارو او فوتو ژورنالېزم" په برخو کې د ګډونکوونکو سره هر اړخیز معلومات شریک کړل.
همدارنګه د کابل ولایت جید عالم ښاغلي شیخ الحدیث مولوي عبدالحمید "حماسي" صاحب د فکري روزنې په برخه کې ګډونوالو ته د اسلام مبارک دین له اړخه لازمې او اړينې توصیې وکړې.
د ورکشاپ په پای کې د لوړو زده کړو وزارت وزیر ښاغلي شیخ مولوي نداء محمد "ندیم" د مطبوعاتو په ارزښت اړینې خبرې وکړې او د ګډونکوونکو وړاندیزونو او نظرونو له آورېدلو وروسته یې د یادو وړاندیزونو په حل لارو تأکید وکړ.
یاد دوه ورځنی ورکشاپ د خیر دعایې په ویلو سره پای ته ورسېد.
