د کابل ښوونې او روزنې پوهنتون کې د کادري بستونو آزموینه واخېستل شوه
د پنج شنبې په ورځ ۲۶/۳/۱۴۰۱هـ ش نېټه د لوړو زده کړو وزارت څخه راغلي پلاوي د تقرر او علمي ترفیعاتو رئیس مفتاح الدین (عزام)، د تحقیق، تألیف او ژباړې رئیس دوکتور مولوي حمیدالله (مزمل) او د ژباړې آمر خلیل الرحمن (رحماني) او د کابل ښوونې او روزنې پوهنتون علمي چارو مرستیال پوهاند جمشید خان (رشیدي) په حضور کې، د کابل ښوونې او روزنې پوهنتون او د بامیانو پوهنتون د علمي کادر د نوماندانو تخصصي آزموینه د کابل ښوونې او روزنې پوهنتون کې په یوې رڼه او عادلانه فضا کې واخیستل شوه. په پيل کې د کابل ښوونې او روزنې پوهنتون د علمي چارو مرستیال پوهاند جمشید خان رشیدي د آزموینې په څرنګوالي خبرې وکړې، او د پوهنځیو له مسؤولینو، استادانو او د څارنې له کمېټې څخه یې وغوښتل تر څو د آزموینې بهیر په عادلانه ډول پرمخ یوسي او پدې بهیر کې روڼتیا او امانت په پام کې ونیسي.
همدارنګه د لوړو زده کړو وزارت څخه راغلي پلاوي د آزموینې د اخیستو څخه د څارنې په لړ کې د پوره روڼتیا غوښتونکي شو او یادونه یې وکړه چې، د هېواد په پوهنتونونو کې د علمي کادر د ګمارنې معیار د نوماند خپله وړتیا او توانايي ده.
د غونډې په پاى کې د ټولو ګډونوالو په حضور کې رسماً آزموينه پيل شوه، چې د لوړو زده کړو وزارت څخه راغلي پلاوي او د کابل ښوونې او روزنې پوهنتون د علمي چارو مرستیال پوهاند جمشید خان (رشیدي) د استادانو په ملتيا د آزموينې له صحنې څخه لیدنه وکړه.
