۱۴۰۰کال، د وږي ۶مه، لوړو زده کړو وزارت
د لوړو زده کړو وزارت سرپرست او همدارنګه د علمي، مالي او اداري او زده کړیالانو چارو معینیتونو سرپرستان، نن په یوه ناسته کې د دغه وزارت رییسانو ته وروپېژندل شول او په رسمي توګه یې کار پیل کړ.
په دغه ناسته کې د لوړو زده کړو وزارت سرپرست شیخ عبدالباقي حقاني، په داسې حال کې چې د دغه وزارت پخواني مشرتابه هم حضور درلود، لوړو زده کړو وزارت یې یوه له مهمو ادارو څخه وبلله او د هېواد لوړو زده کړو استادانو له خدمتونو یې مننه وکړه.
هغه وویل: «ملي او دیني ارزښتونه دوه هغه اساسي معیارونه دي، چې زموږ د هېواد خلکو یې د تاریخ په اوږدو کې د ساتنې لپاره مبارزه کړې او قربانۍ یې ورکړي دي».
هغه زیاته کړه چې خلکو ته د ښو خدمتونو وړاندې کولو لپاره، د پخوانیو مسوولینو او کارکوونکو په همکارۍ او د یادو معیارونو په پام کې نیولو سره به په نیږدې راتلونکي کې د دغه وزارت چارې په رسمي ډول پیل شي.
وروسته د لوړو زده کړو پخواني وزیر دوکتور عباس بصیر وویل: «خوشحاله یم چې په دغه وزارت کې له یوه کال خدمت وروسته، مسوولیت داسې شخصیتونو ته سپارم، چې هم لیاقت او هم هېواد او دندې ته ژمن دي » .
هغه د وزارت نوې مشرتابه ته د همکارۍ ډاډ ورکړ او ویې ویل چې موږ به همېشه د هېواد تحصیلي نظام په خدمت کې یو.
د یادې ناستې په پای کې د لوړو زده کړو وزارت سرپرست شیخ عبدالباقي حقاني، په داسې حال کې چې د وزارت پخواني مشرتابه غړو هم بدرګه کاوه، د وزارت مقام ته ورغی او په رسمي توګه یې کار پیل کړ.
همدارنګه د لوړو زده کړو وزارت سرپرست شیخ عبدالباقي حقاني؛ انجنیر روح الله روحاني د علمي معینیت د سرپرست، انجنیر سید اسماعیل روحاني د زده کړیالانو چارو د معینیت سرپرست او مولوي اسدالله فرید د مالي او اداري معینیت د سرپرست په توګه وروپېژندل.
