کابل ښوونې او روزنې پوهنتون (١٤٠٢) کال محصلینو د فراغت غونډه ترسره شوه!
سې شنبې ورځ ٧/٥/۱۴۴۵ هــ ق چې له ٣٠/٨/١٤٠٢ه.ش نېټې سره سمون لري د کابل ښوونې او روزنې پوهنتون د (کمپیوټر ساینس، اختصاصي علومو، تربیتي او ورزشي علومو، تربیتي او مسلکي علومو، اراوپوهنې او ټولنیزو علومو) پوهنځیو د فراغت غونډه د کابل ښوونې او روزنې پوهنتون د عبدالرحمن بن سمرة د غونډو په عمومي تالار کې د لوړو زده کړو وزارت علمي چارو معین، د کابل ښوونې او روزنې پوهنتون رئیس، علمي چارو مرستیال، پوهنځیو رئیسانو، استادانو، اداري آمرینو او محصلینو په ګډون ترسره شوه.
غونډه د قرآنکریم د څو مبارکو آیتونو په تلاوت سره پیل شو.
لومړۍ د کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا"هاشمي" د غونډې ګډوونکونکو ته د ښه راغلاست ترڅنګ، فارغو محصلینو ته مبارکي ورکړه او په خپلو خبرو کې محصلینو ته د هدف ټاکلو، اسلامي سیاست، دیني او عصري زده کړو او هېواد ته د خدمت کولو اړوند اړیني سپارېښتنې وکړې.
وروسته، د لوړو زده کړو وزارت علمي چارو معین ښاغلي دوکتور لطف الله "خیر خواه" په خپلو خبرو کې محصلینو او د هغوی کورنیو ته د مبارکۍ ترڅنګ وویل: تاسو د هېواد راتلونکي یاستئ خپلو زده کړو ته ادامه ورکړئ او یوازې په لېسانس دورې زده کړو بسنه مکوئ، خپل هېواد او خلکو ته د علم له لارې د خدمت جوګه شئ.
همدارنګه د کابل ښوونې او روزنې پوهنتون د علمي چارو مرستیال ښاغلي پوهاند دوکتور جمشېد خان “رشیدي” محصلینو ته د لېسانس دورې د پای ته رسېدو مبارکي ورکړه، زیاته یې کړه چې، د لوړو زده کړو وزارت او د هېواد نورې ادارې تاسو ته ضرورت لري او تاسو ته به په مختلفو برخو کې دندې درکړي او ټولو محصلینو څخه یې وغوښتل چې د کابل ښوونې او روزنې پوهنتون د ماسټرۍ برنامو کې ګډون وکړي
په پای کې د فراغت غونډه محصلینو ته د مبارکپانو په ورکړې سره پای ته ورسېده شو.
