کابل ښوونې او روزنې پوهنتون د محصلانو چارو معاونیت اړوند د ١٤٠٣ او ١٤٠٤ه.ش کالونو له ٨٠ تنه فارغ شویو محصلینو سره د تحصیلي دورې پر دوام او د خپل مسلک اړوند د دندو پیدا کولو په پار غونډه ترسره شوه!
پنجشنبې ورځ ٤/٧/١٤٤٧ هــ ق چې له ٤/١٠/١٤٠٤ ه.ش نېټې سره سمون لري د کابل ښوونې او روزنې پوهنتون محصلانو چارو معاونیت له لوري له شاوخوا ۸۰ تنو فارغ شویو محصلینو سره د تحصیلي دورې پر دوام او د خپل مسلک اړوند د دندو پیدا کولو په پار غونډه ترسره شوه.
یاده ناسته له محصلینو سره د تحصیلي دورې پر دوام، د خپلو مسلکونو اړوند د دندو پیدا کولو، د پوهنتون سره د اړیکو ساتلو، د هغوی اړتیاوو او ستونزو اورېدلو اړوند نیول شوې وه.
غونډه د قرآن کریم د مبارکو آیتونو په تلاوت سره پیل شوه.
د محصلانو چارو مرستیال ښاغلي مولوي رحمان ګل "وثیق" د غونډې د جوړېدو پر اهمیت خبرې وکړې او ویې ویل چې فارغ شویو محصلینو ته د پوهنتون دوامداره پاملرنه د علمي او ټولنیز مسؤلیت یوه مهمه برخه ده. زیاته یې کړه: کوښښ وکړئ چې د خپلو مسلکونو اړوند دندې ترلاسه کړئ، تحصیلي دورې ته دوام ورکړئ او د ماسټرۍ او دوکتور تر کچې تحصیل وکړئ، همدارنګه یې وویل: نن سبا یوازې علمي سند بسنه نه کوي، بلکې د کار بازار مهارتونه، عملي تجربه او سمه لارښوونه غواړي. له همدې امله، د محصلانو چارو معاونیت هڅه کوي چې د دندې پیدا کولو درسونه، لکه د سي وي لیکنه، د مرکې چمتووالی، د مسلکي اړیکو جوړول او د کار بازار پېژندنه، د محصلینو لپاره دایر کړي. نوموړي همدارنګه زیاته کړه: د دې درسونو تر څنګ به په نورو برخو کې هم همکاري پراخه شي، لکه د لنډمهالو مسلکي کورسونو برابرول، د عملي کار (انټرنشیپ) زمینې رامنځته کول، د دولتي او خصوصي ادارو سره همغږي، او د کارموندنې اړوندو معلوماتو منظم شریکول. او له محصلینو څخه یې وغوښتل یادو برنامو کې ګډون وکړي.
په غونډه کې فارغ شویو محصلینو خپل وړاندیزونه او نظریات د محصلانو چارو مرستیال سره شریک کړل او د ګډونوالو لخوا پر مهمو موضوعاتو بحث او خبرې وشوې.
