کابل ښوونې او روزنې پوهنتون استادانو ته یو ورځنی ښوونیز- لارښودي ورکشاپ وړاندې شو!

  سه شنبه، ٨/١٤٤٧/٢٢ ه.ق
د کابل ښوونې او روزنې پوهنتون، علمي چارو معاونیت اړوند د استادانو مسلکي پراختیا آمریت له لوري د پوهنتون استادانو ته (له معتبرو علمي ژورنالونو سره د بلدتیا او پېژندنې روشونو) ترسرلیک لاندې یو ورځنی ورکشاپ د علمي چارو مرستیال، د استادانو مسلکي پراختیا آمر، مسلکي پراختیا مسؤولینو او استادانو په ګډون کې پيل شو.

د ورکشاپ په پیل کې له تلاوت وروسته د علمي چارو مرستیال مولوي احسان الله "ناصح" د ورکشاپ مقدماتي وینا وکړه، ده وویل: له معتبرو علمي ژورنالونو سره د استادانو بلدتیا خورا اړینه ده، ځکه استادان باید خپلې څېړنیزې مقالې په معتبرو ژورنالونو کې نشر ته وسپاري، ترڅو ګټه اخیستونکي په ښه توګه له دې مقالو څخه استفاده وکړي او همدارنګه یې د ورکشاپ ارزښت اړوند هراړخیزې خبرې وکړې.

ورپسې د استادانو مسلکي پراختیا آمر پوهنوال دوکتور عبدالجبار"څپاند" د غونډې ګډونوالو ته د ورکشاپ د موخو اړوند معلومات ورکړل، ده وویل: دا ډول ورکشاپونه د نوې پوهې، تجربو شریکولو او د علمي مقالو نشرولو د لا پیاوړتیا لپاره ځانګړی اهمیت لري.

وروسته یاد ورکشاپ د پوهندوی دوکتور غلام حضرت ایمل "رسا" لخوا رسماً پیل او له ګډونوالو سره د علمي معتبرو ژورنالونو له معیارونو سره د بلدتیا او د دې ژورنالونو د پېژندنې اړوند یې هراړخیز معلومات شریک کړل.

د اطلاعاتو، نشراتو او عامه اړیکو امریت