وردگ د لوړو زده کړو موسسئې، کابل ښوونې او روزنې او پروان پوهنتونونو د کادري بستونو نوماندانو څخه د نړیوالې (انگلیسي) ژبې آزموینه واخیستل شوه!
سې شنبې ورځ ۱۴۰۲/۰۲/۱۲ ه.ش نېټه وردګ د لوړو زده کړو مؤسسې ریاضي څانګې (نارینه)، کابل ښوونې او روزنې پوهنتون عمومي ښوونې او روزنې څانګې (نارینه) او پروان پوهنتون د کیمیا څانګې (نارینه) کادري بستونو نوماندانو څخه د نړیوالې (انگلیسي) ژبې آزموینه د کابل ښوونې او روزنې پوهنتون په آی سي ټي (ICT) مرکز کې واخیستل شوه.
په پیل کې د کابل ښوونې او روزنې پوهنتون د استادانو همغږۍ چارو څانګې آمر ښاغلي پوهنمل نجیب الله “بیگزاد“ د آزموینې له بهیر څخه د لیدنې پر مهال استادانو او تخنیکي ټيم ته سپارښتنه وکړه، چې گډونوالو نوماندانو ته په ښه توگه لارښوونه وکړي او آزموینه دې د علمي نورمونو او اصولو سره سمه په شفافه توگه واخیستل شي، چې د هغوی له خوا د اجراأتو ډاډ ورکړل شو.
همدارنګه، د پوهنتون د ژبو او ادبیاتو پوهنځي د انگلیسي څانګې آمر پوهاند عبدالجلیل “کهدستانی“ هم د آزموینې له شفافیت، امانت دارۍ او نظم ټولو ګډونوالو ته ډاډ ورکړ او په خپله وینا کې یې زیاته کړه چې د آزموینې پوښتنې د آزموینې له پیل یو ساعت مخکې په ډېر محرمانه ډول سیسټم ته آپلوډ شوې دي او هېڅوک يې په اړه معلومات نه لري.
ورپسې د کابل ښوونې او روزنې پوهنتون د معلوماتي تکنالوژۍ څانګې آمر ښاغلي محمدمنصور “واحدي” د آزموینې او سیسټم په اړه لنډ معلومات ورکړل او ویې ویل چې: “ آزموینه په شفاف ډول د (Online Exam Program (OEP)) له لارې اخیستل کېږي، نوموړی سیسټم پرته له کوم جعل او لاس وهنې خوندي دی، سیسټم د آزموینې له پای ته رسېدو سره بې له کوم ځنډ پایلې اعلانوي، استادان، د آزموینې هئیت او ګډونوال نوماندان کولای شي په یو وخت او یو ځای د آزموینې پایلې د کمپیوټر پر مخ وگوري “
ورپسې د معلوماتي تکنالوژۍ څانګې تخنیکي ټيم په لارښوونه د آزموینې اخیستلو لړۍ رسمأ پیل شوه.
د یادونې وړ ده چې د بین المللي (انګليسی) ژبې آزموینه کې د کامیابو نوماندانو مسلکي (تحریري) آزموینه به د راتلونکې سې شنبې ورځ د ۱۹/۰۲/۱۴۰۲ نېټه د سهار په (۹) بجو د کابل ښوونې او روزنې پوهنتون علمي چارو معاونیت کې اخیستل کېږي.
