د معتبرو او نامعتبرو نړیوالو ژورنالونو د پېژندنې سیمینار
د شهید استاد رباني د ښوونې او روزنې پوهنتون د مسلکي پراختیا مرکز خپلې وجودي فلسفې ته په کتو سره د پوهنتون د علمي او اداري کادر د مسلکي پوهې د ډېرولو، ښه کولو او پیاوړي کولو لپاره د علمي پروګرامونو جوړولو ته ژمن دی. په همدې موخه یې د ۱۴۰۰ کال د زمري میاشتې په ۱۳مه نېټه د چهارشنبې په ورځ د پوهنتون استادانو او د څانګو آمرانو ته د معتبرو نړیوالو ژورنالونو د پېژندنې په نامه یو ورځنی سیمینار جوړ کړ. د سیمینار په پیل کې د شهید استاد رباني د ښوونې او روزنې پوهنتون رئیسې آغلې پوهنوال لیلما شریفي یما د علمي آثارو د خپراوي او معتبرو نړیوالو ژورنالونو د پېژندلو پر اړتیا او اهمیت خبرې وکړې. ورپسې دغه سیمینار ښاغلي پوهنوال همایون غفوري، ښاغلي پوهنیار نجیبالله بېګزاد او آغلې پوهنیار نرګس ستانکزۍ د آسانچارو په توګه پر مخ یووړ او پر لاندې مسایلو یې بحثونه وکړل:
۱- د معتبرو ژورنالونو ځانګړنې.
۲- د نامعتبرو ژورنالونو پېژندنه.
۳- د ژورنال ټاکنه.
۴- د نامعتبرو ژورنالونو ځانګړنې.
۵- د ګډونوالو بحث او نظرونه.
