د سولې پنځه ورځنې ورکشاپ پای ته ورسېده
د شهید استاد ربانی ښوونې او روزنې پوهنتون د بېلابېلو څانګو محصلينو ته د پوهنتون د سولې مرکز له لوري پنځه ورځنې ورکشاپ چې د سولې او شخړو حل په برخه کې په لاره اچول شوی ؤ د ۱۳۹۹ کال د پنجشنبې ورځ د لیندۍ په ۲۰مه، پای ته ورسېده. د غونډې په پیل کې د محصلانو چارو مرستيالې آغلې پوهندوی ذکيه ظاهر شريفيان، د خپلو ویناو پرمهال، ياد ورکشاپ یې د محصلانو د ظرفيت لوړونې لپاره مهم وباله، ورپسې د کمپيوټر ساينس پوهنځي رئیس ښاغلي پوهنوال قربانعلی فروغ، د سولې مرکز څخه غوښتنه وکړه چې د سولې په پروګرامونو کې د ټولو پوهنځيو محصلانو ته ونډه ورکول شي، وروسته ښاغلي ډاکټر عبدالحبیب خالد په خپله وينا کې وويل وروسته له هغې چې ما استادانو ته د سولې په برخه کې د ماسټر ټرينر په توګه ګډون وکړ او مطالعه مې وکړه نو د هېواد د تحصيلي نصاب په هکله زما آند بدل شو چې باید په نصاب کې د سولې مضمون ځای پرځای شي، ورپسې د ټولنیزو علومو پوهنځی استاد ښاغلي پوهنمل ډاکټر ذبيح الله اسدي، وويل چې د سولې مرکز د پوهنتون د ټولو محصلانو او استادانو لپاره د سولييزو زده کړو يو معياري ښوونځی دی چې بايد په اعظمي توګه ګټه ترې واخيستل شي، همدارنګه د ورکشاپ اخیستونکو استادانو په استازيتوب ښاغلي ډاکټر محمد داؤد سخنور د سولې ورکشاپونه د استادانو لپاره اړين وبلل او ټینګار يې وکړ چې ياد ورکشاپونه بايد لا زيات شي، همدارنګه د محصلانو په استازيتوب ښاغلي شاهد ځاځي غوښتنه وکړه چې ياد پروګرامونه پراخ شي او نورو محصلانو ته هم د سولې او شخړو د حل تاکتيکونه وښودل شي، د غونډې په پای کې ګډونوالو ته بريلیکونه وویشل شول.
