د تدریسي بهیر ښه والي په پار د کابل ښوونې او روزنې پوهنتون رئیس د یاد پوهنتون له هغو استادانو سره چې د پوهاندی علمي رتبې یې اخیستي، غونډه ترسره وکړه!
شنبې ورځ د ٥/٨/١٤٠٣ هـ.ش چې له ٢٣/٤/١٤٤٦ هـ.ق نېټې سره سمون لري د تدریسي بهیر ښه والي په پار د کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا"هاشمي" د یاد پوهنتون له هغو استادانو سره چې د پوهاندی علمي رتبې یې اخیستي، غونډه ترسره وکړه.
غونډه د قرانکریم د څو مبارکو آیاتونو په تلاوت سره پیل شوه.
په یاده غونډه کې د پوهنتون رئیس، علمي چارو مرستیال او استادانو ګډون درلود.
د کابل ښوونې او روزنې پوهنتون رئیس ښاغلي شیخ الحدیث سید بشیر آغا "هاشمي" په خپلو خبرو کې د ښه راغلاست وینا ترڅنګ، استادانو ته وویل: قدرمنو استادانو تاسو د پوهنتون لپاره یوه لویه سرمایه یاستئ، خوښ یم چې له تاسو سره غونډه کې ګډوون کوم، قدرمنو استادانو دا چې ستاسو د پوره تجربې خاوندان یاستئ او د پوهنتون تدریسي بهیر ښه والي برخه کې ستاسو ونډه مو تر نورو استادانو زیاته ده، غواړم چې له ما سره سم د پوهنتون کیفیت لوړاوي برخه کې پوره همکاري وکړئ.
ښاغلي "هاشمي" استادانو ته په خپلو رشتو کې د زیاتو څېړنو ترسره کولو، علمي مقالو لیکلو، داخلي او بهرني ژورنالونو ته د مقالو لېږلو، د هغو استادانو چې د ترفېع او تقرر لپاره کنفرانسونه وړاندې کوي د اصولو او معیارونو مطابق د یادو کنفرانسونو څېړلو او محصلینو سره په تحقیقي برخو کې د پوره همکارۍ اړوند لازمې سپارېښتنې وکړې.
په پای کې، د استادانو د نظرونو او وړاندیزونو اورېدلو وروسته د یادو مسایلو اړوند د عملي کولو هوکړه وشوه.
غونډه د دعایې په ویلو سره پای ته ورسېده.
