د افغانستان ښوونیزو او لوړو زده کړو پیاوړتیا ملي کنفرانس لومړۍ ورځ پای ته ورسېده!
چهار شنبې ورځ ١١/٧/۱۴۴۵ هــ ق چې له ٤/١١/١٤٠٢ ه.ش نېټې سره سمون لري د افغانستان ښوونیزو او لوړو زده کړو پیاوړتیا ملي کنفرانس د ا.ا.ا سیاسي مرستیال، لوړو زده کړو وزارت سرپرست وزیر، لوړو زده کړو وزارت معیینانو او رئیسانو، پوهنې وزارت سرپرست وزیر، پوهنې وزارت معیینانو او رئیسانو، د آزموینو ملي ادارې رئیس، د پوهنتونونو رئیسانو، پوهنتونو معاونینو او استادانو، کابل ښوونې او روزنې پوهنتون رئیس، معاونینو او استادانو په ګډون پيل شو.
کنفرانس د قرآنکریم د څو مبارکو آیتونو په تلاوت سره پیل شو.
لومړی، کابل ښوونې او روزنې پوهنتون رئیس ښاغلي شیخ الحدیث سید بشیر آغا "هاشمي" د ښه راغلاست وینا تر څنګ د کنفرانس په دایرېدو خوښي څرګنده کړه او د کنفرانس دایرېدو اړوند یې هر اړخیزي خبرې وکړې.
وروسته، د کابل ښوونې او روزنې پوهنتون علمي چارو مرستیال ښاغلي پوهاند دوکتور جمشېدخان "رشیدي" د کنفرانس پرانیستي وینا ترڅنګ د کنفرانس اهمیت او ضرورتونو موخو او اهدافو، د مقالو شمېر، درجو او کنفرانس نورو برخو اړوند بشپړ معلومات ورکړل.
د کنفرانس په جریان کې د ا.ا.ا سیاسي چارو مرستیال، لوړو زده کړو سرپرست وزیر او پوهنې وزارت وزیر د ملي کنفرانس اړوند هر اړخیزي خبرې وکړې.
د یادولو وړ ده چې د کنفرانس په لومړۍ ورځ (١٠) مقالې د استادانو لخوا ارائه شوې.
