د اداري غونډې راپور!

د کابل ښوونې او روزنې پوهنتون اداري غونډه د یکشنبې په ورځ د 18/12/1443 د 26/4/1401 سره سم د سهار په 11:00 بجو د پوهنتون د علمي چارو مرستیال پوهاند جمشید خان رشیدي په مشرۍ تر سره شوه، غونډه د قرآن عظیم الشان د څو مبارکو آیتونو په تلاوت سره پیل او په لاندې موضوعاتو خبرې وشوې.

لومړی د علمي چارو مرستیال جمشید خان رشیدي د غونډې ټولو غړو ته د ښه راغلاست پرمهال، د مشرتابه پلاوي محترمو غړو او د پوهنتون ټولو استادانو او اداري کارکوونکو ته د نېکمرغه لوي اختر مبارکي ورکړه.

همدا رنګه په دې غونډه کې د سمستر پای او د وروستیو آزموینو د پیل په اړه خبرې وشوې او پرېکړه وشوه چې، د لوړو زده کړو وزارت له خوا د را لېږل شوي مهالوېش له مخې به د سمستر پای د سرطان میاشتې په ۳۱ مه نېټه وي، د سمستر آزموینې به د روان کال د اسد په لومړۍ نېټه پیل شي او درې اونۍ به دوام وکړي.

غونډه د پوهنتون په چارو کې د بریالیتوب په دعا سره پای ته ورسیده.