کابل ښوونې او روزنې پوهنتون د ټولنیزو علومو او کمپیوټرساینس پوهنځیو د رئیسانو پېژند غونډې ترسره شوې!

دوشنبې ورځ د ٢/٥/١٤٤٦ ه.ق چې له ١٤/٨/١٤٠٣ ه.ش نېټې سره سمون لري د کابل ښوونې او روزنې پوهنتون د ټولنیزو علومو پوهنځي ریاست ته د ښاغلي پوهندوی ضیاالحق "امیري" او کمپیوټر ساینس پوهنځي ریاست ته د ښاغلي پوهنوال همایون"غفوري" د پېژندنې په پار، چې د کابل ښوونې او روزنې پوهنتون رئیس، علمي چارو او تحقیقاتو او علمي مجلو مرستیالانو، پوهنځیو رئیسانو، یادو پوهنځیو استادانو او کارمندانو ګډون درلود، پېژند غونډې ترسره شوې.

غونډې د قرآنکریم د څو مبارکو آیتونو په تلاوت سره پیل شوې.

لومړی، د کابل ښوونې او روزنې پوهنتون رئیس ښاغلي شیخ الحدیث سید بشیرآغا "هاشمي" په خپلو خبرو کې د ټولنیزو علومو او کمپیوټر ساینس پوهنځیو له مخکینیو رئیسانو څخه منندویي وکړه چې د یادو پوهنځیو لپاره یې زیاتې لاسته راوړنې درلودې او د الله ج له دربار څخه یې ورته ژوند کې د لا زیاتو بریاوو هیله وکړه، زیاته یې کړه: دا چې تغییر او تبدیل د ا.ا په نظام کې یو اصل دی، نو هره اداره کې دا اصل شتون لري او ښاغلیو پوهنوال همایون"غفوري" د کمپیوټر ساینس پوهنځي او ښاغلی پوهندوی ضیاالحق "امیري" د ټولنیزو علومو پوهنځي ته چې د لوړو زده کړو وزارت د وړاندیز او د ریاست الوزراء محترم مقام د حکم په اساس د یادو پوهنځيو رئیسانو په توګه ټاکل شوي مبارکي وایو، زیاته یې کړه: ښاغلی "امیري" او ښاغلی "غفوري" د دیني او علمي استعداد خاوندان دی د الله تعالی له درباره ورته په چارو کې کامیابي غوارو او هیله لرو چې د پوهنتون د پرمختګ په برخه کې هېڅ ډول کوښښونه ونه سپموي.

په پای کې ښاغلي پوهنوال همایون "غفوري" او ښاغلي پوهندوی ضیاالحق "امیري" د ا.ا.ا او لوړو زده‌کړو وزارت مقام له باور څخه په مننې سره وویل: د ا.ا.ا، لوړو زده کړو وزارت او کابل ښوونې او روزنې پوهنتون ریاست مقام ته ته ډاډ ورکوو چې هېڅ ډول هڅې به ونه‌ سپموو او کوم مسؤولیت چې راته سپارل شوی په ښه توګه به یې ادا کړو.

غونډې د خیر په دعا سره پای ته ورسېدې.