کابل ښوونې او روزنې پوهنتون اداري کارمندانو ته یو ورځنی ښوونیز ورکشاپ دایر شو!
پنجشنبه- ۹،۱،۱۴۴۸ ه،ق
د سهار ستوري کلینیک له لوري د استادانو مسلکي پراختیا امریت سره په همغږۍ د کابل ښوونې او روزنې پوهنتون اداري کارمندانو ته "د لومړنیو صحي مرستو رسولو" ترسرلیک لاندې یو ورځنی ښوونیز سمینار دایر شو، چې په علمي او عملي بڼه ګډونوالو سره د لومړنیو صحي مرستو رسولو اړوند هراړخیز معلومات شریک شول.
د دې سمینار هدف او موخه د لومړنیو مرستو په اړه د پوهې کچه لوړولو، په بیړنیو حالاتو کې د چټک او اغېزمن غبرګون وړتیا رامنځته کول، د چاپېریالخوندیتوب او د روغتیا فرهنګ پیاوړی کول او په بېړنیو حالاتو کې د ټپیانو او ناروغانو لپاره د لومړنیو مرستو اصولو زده کړه وه.
د استادانو مسلکي پراختیا امر پوهنوال دوکتور عبدالجبار څپاند د دې سمینار پر ارزښت د خبرو ترڅنګ یې ګډونوالو ته د بدني صحتمنتیا په پار د چاپېریال پاک ساتنې او د انساني وجیبې اداء کولو په پار په لومړنیو صحي مرستو رسولو اړوند هراړخیزه وینا وکړه.
وروسته له مقدماتي خبرو دغه سمینار د ډاکټر عبدالله عابد له لوري وړاندې شو او په تشریحي او عملي برخو کې یې ګډونوالو ته معلومات ورکړل.
اطلاعاتو، نشراتو او عامه اړیکو امریت
