کابل ښوونې او روزنې پوهنتون د کمپیوټر ساینس پوهنځي لخوا د یاد پوهنځي محصلینو ته (په کمپیوټر ساینس رشته کې د ابتکار او نوښت) ترسرلیک لاندې یو ورځنۍ سیمینار دایر شو!
یکشنبې ورځ ۱۹/۴/۱۴۴۷ هــ ق چې له ۲۰/۷/۱۴۰۴ ه.ش نېټې سره سمون لري د کابل ښوونې او روزنې پوهنتون د کمپیوټر ساینس پوهنځي لخوا د یاد پوهنځي محصلینو ته (په کمپیوټر ساینس رشته کې د ابتکار او نوښت) ترسرلیک لاندې یو ورځنۍ سیمینار د کابل ښوونې او روزنې پوهنتون رئیس، کمپیوټرساینس پوهنځي رئیس، استادانو او محصلینو په ګډون پيل شوه.
سیمینار د قرآنکریم د څو مبارکو آیتونو په تلاوت سره پیل شو.
په پیل کې، د کابل ښوونې او روزنې پوهنتون رئیس ښاغلي شیخ الحدیث سید بشیرآغا "هاشمي" د سیمینار اړوند مقدماتي وینا وکړه، زیاته یې کړه: کمپیوټر ساینس نن د بشریت د پرمختګ، اقتصاد او فرهنګ مهم محور دی. زموږ هیواد هغه وخت پرمختګ کولای شي چې ځوان نسل د تخنیکي نوښت او فکري ابتکار روحیه ولري. محصلین باید زده کړي چې څنګه له خپلو علمي زده کړو خلاقه استفاده وکړي او خپل مسلک له لارې هېواد ته د خدمت جوګه وګرځي.
وروسته، د کمپیوټر ساینس پوهنځي رئیس ښاغلي پوهنوال همایون"غفوري" خپلو خبرو کې وویل: موږ هڅه کوو چې داسې چاپیریال رامنځته کړو چې محصلین یوازې نظري درسونه ونه څاري، بلکې د نوو مفکورو، پروژو او تخنیکي نوښتونو د عملي کولو توان هم پیدا کړي.
یاد سیمینار د کمپیوټر ساینس پوهنځي استاد ښاغلي پوهنیار عبدالحمید"همت" لخوا وړاندې شو او یادې رشتې کې د نوښت رول، د سافټویر جوړونې، مصنوعي ذکاوت او سایبري امنیت اړوند له ګډونوالو سره هراړخیز معلومات شریک شول.
سیمینار د دعایې په ویلو سره پای ته ورسېد
