لوړو زدهکړو وزارت چمتو دی څو د ۱۴۰۰ کال د ونو کېنولو په جشن کې په پراخه توګه ونډه واخلي.
دغه خبره د لوړو زدهکړو وزیر ډاکټر عباس بصیر د چاپیریال ساتنې ملي ادارې له رییس شاه زمان میوندي سره په لیدنه کې وکړه.
د لوړو زده کړو وزیر د چاپېریال ساتنې ملي ادارې لهخوا د ۱۴۰۰ کال د ونو کېنولو په جشن کې له بلنې مننه وکړه او ویې ویل؛ چې د مرکز او ولایتونو د ادارو په کچه د مسوولیت پېژندنې او همکاریو په خاطر په یوه چوکاټ کار کوو، تر څو د هېواد په کچه د لوړو زده کړو په کورنۍ کې د همکاریو پراخه زمینه برابره شي.
وروسته د چاپېریال ساتنې ملي ادارې رییس شاه زمان میوندي، د ونو اېښودلو په جشن کې د ګډون په موخه د لوړو زده کړو وزارت له چمتووالي مننه وکړه او ویې ویل؛ چې د چاپېریال ساتنې ملي ادارې هڅه دا ده، څو د ونو اېښودلو په جشن کې ډېر خلک برخه واخلي. هغه زیاته کړه چې د چاپېریال ساتنې ملي اداره په پام کې لري، څو د نوي کال په پیلېدو سره ۱۴سوه او ۲۶میلیونه ونې کېنوي. ښاغلي میوندي وویل، چې په دغه برخه کې د لوړو زده کړو وزارت همکاري، د یوه تحصیلي بنسټ په توګه یوه الګو ده او زیاته اغېزه لري او دغه کار د هېواد په کچه د ونو کېنولو د فرهنګ عامولو لامل ګرځي.
