کابل ښوونې او روزنې پوهنتون او سلام خصوصي پوهنتون تر منځ د دوه اړخیزو همکاریو هوکړه لیک لاسلیک شو!
شنبې ورځ د ۱۶/۴/١٤٠٣ ه.ش چې له ۲۹/۱۲/١٤٤٥ ه.ق نېټې سره سمون لري د کابل ښوونې او روزنې پوهنتون او سلام خصوصي پوهنتون تر منځ په دوه اړخیزو علمي او تحقیقي برخو کې هوکړه لیک د کابل ښوونې او روزنې پوهنتون رئیس ښاغلي شیخ الحدیث سید بشیر آغا "هاشمي" او سلام خصوصي پوهنتون علمي چارو مرستیال ښاغلي استاد ابوبکر "مدقق" ترمنځ لاسلیک شو.
کابل ښوونې او روزنې پوهنتون رئیس ښاغلي شیخ الحدیث سید بشیر آغا"هاشمي" د یاد هوکړه لیک اړوند خوښي څرګنده کړه، او د دواړو خواوو ترمنځ د هوکړه لیک په تطبیق کولو یې تأکید وکړ، زیاته یې کړه، یاد هوکړه لیک یوازې د صفحو پرمخ نه، باید عملي بڼه ولري.
یاد هوکړه لیک چې په شپږو(٦)مادو کې ترتیب او د کابل ښوونې او روزنې پوهنتون او سلام خصوصي پوهنتون ترمنځ په علمي او تحقیقي برخو کې د (سیمینارونو او ورکشاپونو دایرولو، ظرفیت لوړاوي، کتبې آثارو ترجمه او چاپ، علمي مجلو کې د تحقیقي آثارو چاپ، سیر علمي برنامو برابرولو او نورو برخو کې د دوه اړخیزو ګډه همکاريو)اړوند لاسلیک شو.
یاده غونډه د هوکړه لیک په لاسلیک او دعایې ویلو سره پای ته ورسېد.
