د شهید استاد رباني د ښوونې او روزنې پوهنتون او (JWL) مؤسسې تر منځ د همکارۍ ناسته
د ۱۴۰۰ کال د چنګاښ میاشتې په ۲۳مه نېټه د چهارشنبې په ورځ د شهید استاد رباني د ښوونې او روزنې پوهنتون او په کابل کې د (JWL) مؤسسې تر منځ د همکارۍ ناسته د پوهنتون د استادانو، محصلانو او اداري کارکوونکو د علمي کچې د لوړولو په موخه د شپږمیاشتي آنلاین کورسونو د جوړولو لپاره د (JRS) مؤسسې په همکارۍ وشوه. په دې ناسته کې د شهید استاد رباني د ښوونې او روزنې پوهنتون رئیسې آغلې پوهنوال لیلما شریفي یما، د پوهنتون د علمي چارو مرستیال ښاغلي پوهاند جمشېدخان رشیدي او د یادې مؤسسې لهخوا د (JWL) مؤسسې رئیس ښاغلي اوربیل (Orbille) او ښاغلي فهیم اربابخېل ګډون کړی و.
په سر کې د پوهنتون رئیسې د (JWL) مؤسسې رئیس ته ښه راغلاست ووایه او د خپلو خبرو په لړ کې یې د دغې ادارې د نېک او اکاډمیک اقدام مننه وکړه. آغلې یما د یاد پروګرام ملاتړ اعلان کړ او له راغلي پلاوي یې وغوښتل چې د وړتیاوو جوړولو په برخه کې د پوهنتون له بشري ځواک سره ډېره همکاري وکړي. ورپسې د پوهنتون د علمي چارو مرستیال ښاغلي پوهاند جمشېدخان رشېدي هم خپل نظرونه څرګند کړل او ټینګار یې وکړ چې یاد پروګرام دې د یوه هوکړه لیک پر بنسټ په پوهنتون کې پیل شي. په پای کې د (JWL) مؤسسې رئیس ښاغلي اوربیل (Orbille) هم د موضوع په اړه معلومات وړاندې کړل او د پوهنتون مشرتابه پلاوي ته یې ډاډ ورکړ چې آنلاین کورسونه به له نړیوالو منلشویو معیارونو سره سم جوړ او پلي کړي. د دې ناستې په پای کې پرېکړه وشوه چې پر موضوع لا ډېر تمرکز وشي او راتلونکې ناستې ته دواړه لوري خپل نظرونه او وړاندیزونه شریک کړي.
