امتحانِ زبان‌های بین‌المللی (انگلیسی و عربی) کاندیدانِ بست‌های کادری پوهنتون‌های تعلیم وتربیه کابل، لغمان، البیرونی و کندز و مؤسسه خصوصی تحصیلات عالی جهان اخذ گردید!
روز دوشنبه موُرخ ۱۰/۱۰/۱۴۰۳ مطابقِ ۲۸/۶/۱۴۴۶ ه.ق. امتحانِ زبان‌های بین‌المللی (انگلیسی و عربی)کاندیدان بست‌های کادری پوهنتون‌های تعلیم و تربیه کابل، لغمان، البیرونی و کندز و مؤسسه خصوصی تحصیلات عالی جهان در مرکز تکنالوژی معلوماتی(ای-سی-تی) پوهنتونِ تعلیم وتربیه کابل اخذ گردید.
در آغاز، محترم شیخ الحدیث سید بشیر آغا "هاشمی" رئیس پوهنتون، ضمن خوش آمدید راجع به ارزش علم و مسوولیت‌های استادان در جامعه سخنان همه‌جانبه گفته و به کاندیدان بست‌های کادری، استادان و تیم تخنیکی راجع به چگونه‌گی امتحان توصیه‌های لازم کرده و به تمام اشتراک کنندهگان از شفافیت کامل و امانت‌داری در امتحان اطمینان دادند.
هم‌چنان، پوهنمل دوکتور قدرت الله "عمرخیل" معاون امور علمی پوهنتون، راجع به پروسیجر امتحان به همه اشتراک کنندهگان معلومات کامل ارائه کرد.
بعداً، محترم، محمدمنصور "واحدی" آمر تکنالوژی معلوماتی پوهنتون، به اشتراک کنندهگان راجع به سیستم امتحان آنلاین معلومات همه‌جانبه را ارائه کرد.
قابل ذکر است که امتحانِ تخصصی(تحریری) کاندیدان موفق امتحان زبان‌های بین‌المللی (انگلیسی و عربی) روز سه‌شنبه موُرخ ۱۱/۱۰/۱۴۰۳ مطابقِ ۲۹/۶/۱۴۴۶ ه.ق. در پوهنتون تعلیم و تربیه کابل اخذ می‌گردد.
