کابل ښوونې او روزنې پوهنتون رئیس د خاتم النبیین خصوصي پوهنتون له مسؤولینو سره لیدنه وکړه!
یکشنبې ورځ د ٢١/٨/۱۴۴۵ هـــ.ق. چې له ١٣/١٢/١٤٠٢ه.ش نېټې سره سمون لري د کابل ښوونې او روزنې پوهنتون رئیس ښاغلي شیخ الحدیث مولوي سید بشیرآغا "هاشمي" د خاتم النبیین خصوصي پوهنتون له مسؤولینو سره په خپل کاري دفتر کې لیدنه وکړه.
په پیل کې، د کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا "هاشمي" د خاتم النبیین پوهنتون مسؤولینو ته د ښه راغلاست ترڅنګ، وویل: ستاسو له راتګ څخه د کابل ښوونې او روزنې پوهنتون ته خوښ یو او له مسؤولینو سره یې د پوهنتون اړونده پوهنځیو، ماسټرۍ برنامو، دوکتورا برنامې او د پوهنتون علمي کادرونو په هکله اړین معلومات شریک کړل.
وروسته، د خاتم النبیین پوهنتون مسؤولینو د یادې غونډې اړوند وویل: زمونږ د راتګ موخه او هدف د کابل ښوونې او روزنې پوهنتون له تجاربو ګټه اخیستل دي او هیله لرو چې راتلونکي کې د دواړو پوهنتونونو تر منځ د دوه ارخیزو همکاریو هوکړه لیک لاسلیک شي.
د غونډې په جریان کې د دواړو خواوو لخوا د هېواد په تحصیلي بنسټونو بحث او خبرې وشوې.
غونډه د خیر دعا په ویلو سره پای ته ورسېده.
