کیفیت لوړاوي معیارونو ته پام؛ د تحصیلي بنسټونو مؤثریت!-٤ورځنی ورکشاپ
یکشنبه- ١٤٤٧/١١/١٦هـ.ق.
د کابل ښوونې او روزنې پوهنتون رهبری، استادانو او اداري کارمندانو ته د کیفیت لوړاوي ١١ معیارونو د ښه تطبیق اړوند څلور ورځنی ورکشاپ پیل شو، چې هدف او موخه یې د نظام اصولو مطابق په پوهنتون کې د دې معیارونو اړوند د ستونزو حل او ښه تطبیق کولو لپاره اغېزمن ګامونه پورته شي.
د ورکشاپ پیل کې د علمي چارو مرستیال مولوي احسان الله ناصح په خپلو خبرو کې د کیفیت لوړاوي پر اهمیت ټینګار وکړ، ویې ویل: د لوړو زده کړو بنسټونه باید د معیاري زده کړو، اغېزمن تدریس او څېړنې له لارې د ټولنې اړتیاوو ته ځواب ووایي. زیاته کړه چې د کیفیت لوړاوی یوازې یو اداري پروسه نه ده، بلکې یو دوامداره اصول دي چې باید د پوهنتون په ټولو برخو کې عملي شي.
همدارنګه، د لوړو زده کړو وزارت د کیفیت لوړاوي رئیس استاد شاکر وحیدي وینا وکړه، نوموړي په خپلو خبرو کې وویل: د اسلامي نظام تر چتر لاندې ټولنې ته خدمت کول لوی نعمت دی، چې د دې نعمت شکر په واقعي خدمت سره د اسلامي اصولو په نظر کې نیولو او د کاري معیارونو پر مراعتولو سره اداء کېدلی شي.
د یادونې وړ ده چې په دې څلور ورځني ورکشاپ کې به د کیفیت لوړاوي ١١ معیارونه تشرېح او توضیح شي او د دې معیارونو اړوند پوهنتون کې شته ستونزې حل او د لا ښه والي لپاره به یې اغېزمن ګامونه پورته شي.
