د کابل ښوونې او روزنې، پروان او وردگ پوهنتونونو کادري بستونو نوماندانو څخه د نړیوالې (انگلیسي) ژبې آزموینه واخیستل شوه!
یکشنبې ورځ ۲۵/۴/۱۴۰۲ هــــ.ش چې له ۲۷/۱۲/۱۴۴۴ هــ ق. نېټې سره سمون لري، د کابل ښوونې او روزنې پوهنتون د عمومي ښوونې او روزنې او معلوماتي تکنالوژۍ څانګو(نارینه)، د پروان پوهنتون ریاضي او کیمیا څانګو (نارینه) او وردګ پوهنتون د ریاضي څانګې (نارینه) کادري بستونو نوماندانو څخه د نړیوالې (انگلیسي) ژبې آزموینه د یاد پوهنتون معلوماتي تکنالوژۍ څانګې اړوند آی سي ټي (ICT) مرکز کې واخیستل شوه.
په پیل کې د کابل ښوونې او روزنې پوهنتون د ژبو او ادبیاتو پوهنځي رئیس ښاغلي پوهاند نورمحمد “احمدزي“ د آزموینې په څرنګوالي خبرې وکړې د استادانو او څارنې کمېټې څخه یې وغوښتل تر څو د آزموینې بهیر په عادلانه ډول پرمخ یوسي او په دې بهیر کې روڼتیا او امانت په پام کې ونیسي.
همدارنګه، د پوهنتون د ژبو او ادبیاتو پوهنځي د انگلیسي څانګې آمر پوهاند عبدالجلیل “کهدستاني“ هم د آزموینې له شفافیت، امانت دارۍ او نظم ټولو ګډونوالو ته ډاډ ورکړ.
ورپسې د کابل ښوونې او روزنې پوهنتون د معلوماتي تکنالوژۍ څانګې آمر ښاغلي محمدمنصور “واحدي” د آزموینې او سیسټم په اړه معلومات ورکړل او ویې ویل چې: “ آزموینه په شفاف ډول د (Online Exam System (OES)) له لارې اخیستل کېږي، نوموړی سیسټم پرته له کوم جعل او لاس وهنې خوندي دی او د آزموینې له پای ته رسېدو سره بې له کوم ځنډ پایلې اعلانوي، استادان، د آزموینې هئیت او ګډونوال نوماندان کولای شي په یو وخت او یو ځای د آزموینې پایلې د کمپیوټر پر مخ وګوري.
ورپسې د معلوماتي تکنالوژۍ څانګې تخنیکي ټيم په لارښوونه د امتحان اخیستلو لړۍ رسمأ پیل شوه.
د یادونې وړ ده چې د (۶۷) شارت لېست شوو نوماندانو له ډلې د بین المللي (انګليسی) ژبې آزموینه کې (۲۹) نوماندان بریالي شول او د بریالیو نوماندانو مسلکي (تحریري) آزموینه به د راتلونکې سې شنبې ورځ ۳/۵/۱۴۰۲هـــ.ش چې د ۶/۱/۱۴۴۵هــ.ق نېټې سره سمون لري د سهار په (۹) بجو د کابل ښوونې او روزنې پوهنتون علمي چارو معاونیت کې اخیستل کېږي.
