د کابل ښوونې او روزنې، بامیان، البیروني او فاریاب پوهنتونونو د کادري بستونو نوماندانو څخه د نړیوالې (انگلیسي) ژبې آزموینه واخیستل شوه!
سې شنبې ورځ 12/10/1402 هــــ.ش چې له 19/6/1445 هــ ق. نېټې سره سمون لري د کابل ښوونې او روزنې، بامیان، البیروني او فاریاب پوهنتونونو د کادري بستونو نوماندانو څخه د نړیوالې (انگلیسي) ژبې آزموینه د یاد پوهنتون په آی سي ټي (ICT) مرکز کې واخیستل شوه.
په پیل کې، د کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا "هاشمي" د آزموینې اړوند استادانو، او څارنې کمېټې ته اړیني سپارېښتنې وکړې او ټولو ګډونوالو ته یې د آزموینې په بهیر کې د پوره روڼتیا او امانتداری ډاډ ورکړ.
همدارنګه، د استادانو د همغږۍ آمر ښاغلي پوهنمل نجیب الله “بېګزاد“ د آزموینې پروسیجر ټولو ګډونوالو ته تشرېح کړ.
په پای کې، د کابل ښوونې او روزنې پوهنتون د معلوماتي تکنالوژۍ څانګې آمر ښاغلي محمدمنصور “واحدي” د آزموینې او سیسټم په اړه معلومات ورکړل، زیاته یې کړه: “ آزموینه په شفاف ډول د (Online Exam Program (OEP)) له لارې اخیستل کېږي، نوموړی سیسټم پرته له کوم جعل او لاس وهنې خوندي دی، او د آزموینې له پای ته رسېدو سره بې له کوم ځنډ پایلې اعلانوي، استادان، د آزموینې هئیت او ګډونوال نوماندان کولای شي په یو وخت او یو ځای د آزموینې پایلې د سیسټم پر مخ وګوري،
د یادونې وړ ده چې د بین المللي (انګليسی) ژبې آزموینه کې د کامیابو نوماندانو تحقیقي (تحریري) آزموینه وروسته د پوهنتون له همدې رسمي پاڼې څخه اعلانېږي.
