پرون د لوړو زده کړو وزارت سرپرست په یوه ناسته کې د دغه وزارت معینانو، رییسانو او همدارنګه د هېواد مرکز او ولایتونو د پوهنتونونو له رییسانو سره، په هېواد کې د لوړو زده کړو د پرمختګ په موخه ګډه ناسته تر سره کړه.
په دغه ناسته کې چې د ولایتونو د پوهنتونونو رییسان د ویډیو کنفرانس له لارې په اړیکه کې وو، د لوړو زده کړو وزارت سرپرست شیخ عبدالباقي حقاني، تعلیم او تعلم د اسلام مقدس دین له واجباتو او د ا.ا.ا له اساسي پروګرامونو وبلل او د هېواد له هغه علمي کادرونو چې په دغه برخه کې یې هڅې کړي مننه وکړه.
شیخ حقاني وویل چې د دیني علومو تر څنګ د تجربوي علومو عامول یوه موخه او اړتیا ده او له دې پرته نه شو کولی چې د سیمې او نړۍ د هېوادونو د پرمختګ له کاروان سره سم مزل وکړو.
هغه د ښکېلاک پر وړاندې د افغانستان مسلمان او مجاهد ولس مېړانې او اېماندارۍ ته اشاره وکړه او د هغوی له بریا یې خوښي څرګنده کړه. دغه راز ویې ویل چې اوسمهال به د نوي اسلامي نظام تر چتر لاندې د هېواد له استادانو او پوهانو سره یو ځای، په متحد ډول او له هر ډول امکاناتو په ګټه اخیستنې سره د افغانانو د مسلکي کولو لپاره هڅه کېږي.
د نورو هېوادونو له ګټورو تجروبو ګټه اخیستنه، د استادانو ظرفیت لوړونه، د نړۍ له معتبرو پوهنتونونو سره اړیکې او د اسلام مقدس دین پر ارزښتونو د هېواد تحصیلي نظام تنظیمول هغه څه وو، چې د لوړو زده کړو وزارت سرپرست ټینګار پرې وکړ.
د لوړو زده کړو وزارت سرپرست وویل: د افغانستان د خلکو د جهاد له بریا وروسته بل ګام د افغانستان ودانول او پرمختګ دی او دغې موخې ته د رسېدو لپاره استادان حیاتي رول لوبلی شي. نومړي د هېواد د بچیانو په زده کړه کې د استادانو هڅې جهاد وباله او له هغوی څخه یې مننه وکړه.
د لوړو زده کړو وزارت سرپرست وویل چې ډېر ژر به د لوړو زده کړو بنسټونه پرانیستل شي او د پوهنتونونو ټولو استادانو او کارکوونکو ته یې سپارښتنه وکړه، چې د یوه ښه پيل په موخه دې خپلو کارونو ته پوره چمتوالی ولري.
په دغه ناسته کې د لوړو زده کړو پخوانی وزیر دوکتور عباس بصیر، د کابل پوهنتون رییس پوهاند دوکتور محمد عثمان بابري او د ځینو نورو پوهنتونونو رییسانو او استادانو په خپلو خبرو کې د هېواد د لوړو زده کړو په اړه د ا.ا.ا له نیک دریځ څخه ملاتړ وکړ او ځينې وړاندیزونه او نظرونه یې ورسره شریک کړل.
د لوړو زده کړو وزارت سرپرست ژمنه وکړه، چې د لوړو زده کړو تحصیلي بنسټونو د ستونزو د حل په برخه کې به هېڅ ډول هڅې ونه سپموي.
