لوړو زده کړو مرکزي او ولایتي تحصیلي بنسټونو مسؤولینو لپاره د مالي او تدارکاتي چارو روزنیز ورکشاپ پای ته ورسېده!
یکشنبې ورځ ٨/٨/۱۴۴۵ ه.ق چې له ٢٩/١١/١٤٠٢ ه.ش نېټې سره سمون لري د لوړو زده کړو مرکزي او ولایتي تحصیلي بنسټونو مسؤولینو لپاره د مالي او تدارکاتي چارو روزنیز ورکشاپ د لوړو زده کړو وزارت سرپرست وزیر، لوړو زده کړو وزارت معینانو او رئیسانو، کابل ښوونې او روزنې پوهنتون رئیس، مرکزي او ولایتي پوهنتونونو رئیسانو او معاونینو او د کابل ښوونې او روزنې پوهنتون معاونینو په ګډون پای ته ورسېده.
ورکشاپ وروستی ورځ د قرآنکریم د څو مبارکو آیتونو په تلاوت سره پیل شوه.
لومړی، د لوړو زده کړو وزارت د مالي او اداري چارو معین ښاغلي محمد حامد"حسیب" یاد ورکشاپ ډېر کامیاب وباله، زیاته یې کړه: د دې ورکشاپ وروسته به د پوهنتونونو مسؤولین په تدارکاتي او مالي برخو کې له هېڅ ډول ستونزو سره مخ نشي.
د ورکشاپ په جریان کې د لوړو زده کړو سرپرست وزیر صاحب په کامیابه توګه د ورکشاپ پای ته رسېدو اړوند خوښي څرګنده کړه او د پوهنتونونو مسؤولینو ته یې په خپلو دندو کې په ښه توګه د فعالیتونو ترسره کولو او د هېواد بچیو ته خدمت کولو اړوند اړینې سپارېښتنې وکړې.
په دې ورکشاپ کې چې د کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا "هاشمي" هم ګډون کړی وو، د کابل ښوونې او روزنې پوهنتون له ټولو کارمندانو څخه یې مننه وکړه چې د لوړو زده کړو وزارت مسؤولینو سره یې د یاد ورکشاپ اړوند همکاري کړې وه.
د یادلو وړ ده چې یاد ورکشاپ وروسته له (٥)ورځو پای ته ورسېدو چې د مرکزي او ولایتي پوهنتونونو مسؤولینو سره د مالي او تدرکاتي چارو(د عامه بودیجې او د هغې ارزښت، عامه بودیجې او مالي سیاستونو، اساسي مفاهیمو، د اړتیاوو معلومول او تدارکاتي پړاوونو، تدارکاتي پلان جوړونې، معیاري فورمو او د داوطلبۍ پروسو ) په برخو کې پوره معلومات شریک شول.
