محصلینو له استازو سره ناسته؛ محصل د پوهنتون د مرکزي هستې حیثیت لري!
سه شنبه۱۴۴۷،۱۰،۱۳ هـ.ق
د کابل ښوونې او روزنې پوهنتون محصلانو چارو مرستیال د یاد پوهنتون لیسانس برنامې اړوند ټولګیو له استازو سره د همغږۍ، ورکشاپونو او سمینارونو ته د محصلینو را جذبولو او په ټوله کې محصلینو ته د هر اړخیزه سهولتونو برابرولو په موخه ناسته وکړه.
پیل کې د محصلانو چارو مرستیال مولوي رحمان ګل وثیق، د محصلینو اړوند د یاد معاونیت پلان شویو برنامو ته په اشارې وویل، چې د علمي نهادونو او پوهنتونو زیات تمرکز د محصلینو په سالمه روزنه، مسلکي وده او دوی ته د هراړخیزو سهولتونو په برابرولو وي؛ ځکه چې محصل د پوهنتون د موخو مرکزي هسته تشکیلوي.
ده دا راز د محصلینو اړوند پلان شویو برنامو کې د محصلینو د استازو رول خورا مهم وباله او په وینا یې چې ټول محصلین باید په ډېر شوق او لېوالتیا سره په یادو برنامو کې ګډون وکړي.
د ناستې په جریان کې د محصلینو استازو له محصلانو چارو معاونیت څخه منندویي وکړه چې د محصلینو لپاره ښوونیزې او روزنیزې برنامې دایروي او ډاډ یې څرګند کړ چې محصلین به له معاونیت سره په پوره همغږي، اخلاص او صداقت سره په ټولو برنامو کې ګډون کوي.
