۱۴۰۰ کال د لړم ۳ لوړو زده کړو وزارت
له پوهنتونونو او لوړو زده کړو بنسټونو سره سیاسي چلند د منلو وړ نه دی.
دغه مطلب د لوړو زده کړو وزارت د محصلانو چارو معینیت سرپرست سید محمد اسماعیل روحاني د خصوصي پوهنتونونو او لوړو زده کړو موسسو اتحادیې له مسوولینو سره په ناسته کې بیان کړ.
نوموړي وویل: « هغه پوهنتونونه چې قانوني ستونزې لري، له لوړو زده کړو وزارت سره په همکارۍ خپل ستونزې حل کړي. د لوړو زده کړو وزارت نوي مشرتابه له هیڅ تحصیلي بنسټ سره سلیقه یې او سیاسي چلند نه مني. » 
همدارنګه په دغه ناسته کې د خصوصي پوهنتونونو اتحادیې مسوولینو خپلو خبرو کې د خصوصي تحصیلي بنسټونو د امنیت او د محصلانو اقتصادي وضعیت په اړه څرګندونې وکړې چې د محصلانو چارو سرپرست معین له خوا د خصوصي پوهنتونونو د پیاوړتیا په برخه کې د هڅو ډاډ ورکړل شو.
د لوړو زده کړو محصلانو چارو سرپرست معین همدارنګه د خصوصي پوهنتونونو له اتحادیې څخه وغوښتل چې ځوانانو ته د یو سالم تحصیلي چاپریال د رامنځته کولو په برخه کې لوړو زده کړو وزارت سره جدي همکاري وکړي.