د نوروز د لرغوني جشن نمانځنه
د شهید استاد رباني د ښوونې او روزنې پوهنتون فرهنګي شورا د روان کال د وري میاشتې په ۴مه نېټه د نوروز لرغوني جشن په مناسبت په اډېټوریم کې غونډه جوړه کړه. د دې غونډې ویاندويي د فارسي ادبیاتو محصل حشمتالله ندیم او د پښتو څانګې محصلې نازیې اندړ وکړه.
دغه غونډه د پوهنتون یوې محصلې خدیجې وليزاده د قرآنکریم د څو مبارکو آیتونو په تلاوت سره پيل کړه، ورپسې د پوهنتون څو محصلانو د هېواد ملي سرود اجرا کړ.
د غونډې په دوام د طبیعي علومو د پوهنځي رئیس پوهنوال محمد حسین ندا د نوي کال د ورځې په مناسبت د پوهنتون د مشرتابه پلاوي د مبارکۍ پیغام واوراوه. استاد ندا د نوروز مبارکي وویله او په تېر کال کې یې د پوهنتون ځینې لاستهراوړنې یادې کړې؛ استادان او محصلان یې څېړنې، علمي لاستهراوړنو او پوهې پراخولو ته لا ډېر وهڅول. ښاغلي ندا د خپلې وینا په پای کې د دغه فرهنګي محفل د جوړولو په خاطر د فرهنګي شورا د مسؤولې ډاکتر دینا محسني نه مننه وکړه.
ورپسې د دري څانګې محصل عظیمالله صمدي او د پښتو څانګې محصلې ریحانې امیني په ګډه دوهبیتۍ او لنډۍ وویلې. ورپسې څو محصلانو د سمنک سندره اجرا کړه او استاد شمس غزنوي د تنباکو ګل کیسه واوروله.
د پروګرام بله برخه تمثیلي پارچه وه چې د ادبیاتو او ارواپوهنې پوهنځیو محصلانو اجرا کړه.
د دې تر څنګ د ماسټرۍ محصلې فروهر نادمیان او د پښتو څانګې د درېیم ټولګي محصلې ناجیې معصومي خپل شعرونه دکلمه کړل.
د فارسي ادبیاتو محصلې فرشتې اماني خپل ادبي مطلب وړاندې کړ. همدا راز د فارسي ادبیاتو محصلانو محمد رفیع رافع او آغلې دیبا په ګډه موسیقي هم اجرا کړه.
ورپسې د بدني روزنې محصلانو ورزشي حرکتونه وکړل او د پښتو څانګې محصلانو اتڼ وکړ.
په پای کې د ارواپوهنې پوهنځي رئیسې زهرې ولید غونډه راټولوله کړه او محفل ختم شو.
د دغه پروګرام په دوام په همدې ورځ د نوروز په مناسبت د پوهنتون د دري څانګې په کتابتون کې د شعر محفل جوړ شو. دغه محفل هم د پوهنتون فرهنګي شورا، د ادبیاتو پوهنځي فرهنګي کمېټې او د دغه پوهنتون محصلانو جوړ کړی و.
د دغه پرګرام ویاندويي د فارسي څانګې محصلې حمیدې خاوري کوله. غونډه د قرآنکریم په تلاوت پیل شوه او ورپسې د ادبیاتو پوهنځي رئیس پوهاند نورمحمد احمدزي وینا وکړه. ښاغلي احمدزي وویل چې نوروز او دغه لرغونی دود باید ژوندی شي او د فرهنګ پر ساتنه یې ټینګار وکړ.
د غونډې په دوام د ماسټرۍ پروګرام آمر پوهاند فضلالحق فضل د فردوسي د شاهنامې ځینې شعرونه دکلمه کړل.
ورپسې پوهاند حشمتالله سحاب د پسرلي په اړه خپل شعر دکلمه کړ.
د پروګرام په دوام د دري ادبیاتو د ماسټرۍ محصل محمد حسن فهیمي خپل غزل واوراوه.
ورپسې د فارسي برخې د لېسانس دورې محصلې پروانې نوري یو متن ولوست.
همدا راز د فارسي ادبیاتو د ماسټرۍ دورې محصلانو احسانشاه الفت او مسعودې صدیقي د نوروز په اړه خپل شعرونه دکلمه کړل.
دغه محفل د ترکي ادبیاتو د محصلې مهریې رحماني او د تربیتي او مسلکي برخې د محصلې قدسیې صدیقي د شعر په دکلمې سره دوام وکړ.
د فارسي برخې محصلانې سکینه ادیب او فاطمه سادات دوې نورې آغلې وې چې شعرونه یې دکلمه کړل او محفل یې ښکلی کړ.
د ناستې په پای کې پوهنوال حسنشاه رحیمي د نوروز د لرغونتیا پر اهمیت خبرې وکړې او غونډه خلاصه شوه.
