د لوړو زده کړو وزارت د علمي برنامو پراختیا ریاست د پوهنتونونو معلوماتي تکنالوژۍ څانګې او د افغان یکس کورسونو د ثبتولو مسؤولینو ته د لوړو زده کړو نوی زده کړیز مدیریت سیستم، معرفی لپاره دوه ورځنی ورکشاپ پیل کړ!
سې شنبې ورځ ٧/٥/۱۴۴۵ هــ ق چې له ٣٠/٨/١٤٠٢ه.ش نېټې سره سمون لري د لوړو زده کړو وزارت د علمي برنامو پراختیا ریاست د مرکزي پوهنتونونو معلوماتي تکنالوژۍ څانګې مسؤلینو او د کورسونو د ثبتولو استادانو ته د کابل ښوونې او روزنې پوهنتون د معلوماتي تکنالوژۍ څانګې په ICT دفتر کې د (برېښنایي زده کړو پېژندنې، برېښانیي زده کړو اهدافو، برېښنایي زده کړو ضرورتونو او برېښنایي زده کړو میتودونو) اړوند، دوه ورځنی ورکشاپ د لوړو زده کړو وزارت علمي چارو معین، لوړو زده کړو علمي مشاور او د علمي پراختیا رئیس او مسؤولینو او د کابل ښوونې او روزنې پوهنتون رئیس، علمي چارو مرستیال او مسؤولینو په ګډون پيل شو.
یاد ورکشاپ د قرآنکریم د څو مبارکو آیتونو په تلاوت سره پیل شو.
لومړی د لوړو زده کړو وزارت د علمي چارو مشاور ښاغلي پوهنوال غلام دستګیر “خاورین” په خپلو خبرو کې د ورکشاپ د ارزښت او اهمیت اړوند معلومات ورکړل او زیاته یې کړه چې د دې ورکشاپ په پای ته رسېدو سره به د یادې څانګو مسؤلین به له ډېرو تجربو برخمن شي او برېښنایي برخو کې به له خنډ سره مخ نشي.
وروسته، د کابل ښوونې او روزنې پوهنتون رئیس ښاغلي شیخ الحدیث مولوي سید بشیر آغا"هاشمي" د غونډې ګډوونکونکو ته د ښه راغلاست ترڅنګ د یاد ورکشاپ اړوند چې د کابل ښوونې او روزنې پوهنتون په کوربه توپ پیل شوی خوښي څرګنده کړه، زیاته یې کړه چې د پوهنتون رهبري د یاد ورکشاپ په مخته وړلو کې پوره همکاري کوي.
همدارنګه، د لوړو زده کړو وزارت علمي معین دوکتور لطف الله "خیر خواه" په هېواد کې د برېښنايي زده کړو د ارزښت او اهمیت په اړه هر اړخیزي خبرې وکړې او د یاد ورکشاپ له مسؤولینو څخه یې مننه وکړه چې داسې برنامې ایجادوي.
په پای کې د مسؤولینو لخوا د برېښنايي زده کړو ورکشاپ رسماً پیل شو.
