د لوړو زدهکړو وزارت ښاغلي هیئت د بلخ پوهنتون څخه لیدنه وکړه.
دغه هیئت، چې د لوړو زدهکړو وزارت د ژباړې، تألیف او څېړنې رئیس، ښاغلي مولوي محمد داوود حقاني تر مشرۍ او د یاد وزارت د اکاډمیکو چارو مشاور او ورسره د ارزونې او څارنې ریاست رئیس په ګډون، بلخ ولایت ته تشریف راوړ او له بلخ پوهنتون څخه لیدنه ؤکړه.
په پیل کې نومؤړي هیئت په بلخ ولایت کې د لوړو زدهکړو وزارت له استازي ښاغلي ډاکتر احمد وزیر صافي او بلخ پوهنتون له مشرتابۀ سره تعارفي لیدنه وکړه.
ورپسې یاد هیئت د بلخ پوهنتون د ژباړې، تألیف او څېړنې غړو او بلخ پوهنتون علمي مجلو او معرف له کتنپلاوي سره مفصلې جلسې او علمي مباحثې وکړې او لوړو زده کړو وزارت او مرکزي ریاستونو د پراختیایي پلان په هکله توضیحات وړاندې کړل او د وزارت د پلانونو او اهدافو د تطبیق په برخه کې یې د بلخ پوهنتون له مشرتابۀ او علمي کادرونو د همکارۍ غوښتنه وکړه.
همدا رنګه د لوړو زدهکړو وزارت له بلخ پوهنتون علمي کادرونو څخه ؤغوښتل، ترڅو یو نړۍوال ژورنال د بلخ پوهنتون په سطحه را منځته کړي.
ورپسې نوموړي هیئت د بلخ پوهنتون د څېرنو له مرکز، معلوماتي ټکنالوژۍ، رسنیز مرکز، علمي مجلې، د پوهنتون له تدریسي او اداري ودانیو، د نجونو او هلکانو د شپهغالي"لیلیه" له ودانیو څخه هم لیدنه وکړه.
د یادونې وړ ده، چې بلخ پوهنتون د هېواد په کچه یو له معتبرو پوهنتونونو څخه شمېرل کېږي، چې تر لسو زیات پوهنځني لري او ویل کېږي، چې په نوي تحصیلي کال کې به د هېواد په کچه په عادي توګه د زدهکړی بهیر پیل شي.
