د شهید استاد رباني د ښوونې او روزنې پوهنتون کې د کرونا د واکسین بهیر پیل شو
د کرونا ویروس د جانسون امریکايي ډول واکسین د تطبیق بهیر د ۱۴۰۰ کال د زمري په ۳یمه نېټه د یکشنبې په ورځ د شهید استاد رباني د ښوونې او روزنې پوهنتون محصلانو، استادانو او اداري کارکوونکو ته د عامې روغتیا وزارت د روغتیايي ټیم لهخوا د پوهنتون د مشرتابه پلاوي په حضور کې رسماً پیل شو.
د شهید استاد رباني د ښوونې او روزنې پوهنتون رئیسې آغلې پوهنوال لیلما شریفي یما د پوهنتون محصلانو، استادانو او اداري کارکوونکو ته د واکسین د تطبیقولو لپاره د عامې روغتیا وزارت له روغتيايي ټیم څخه مننه وکړه. د پوهنتون رئیسې په خپلو خبرو کې ټینګار وکړ چې د واکسین د تطبیق بهیر باید چټک شي او د پوهنتون له محصلانو، استادانو او کارکوونکو یې وغوښتل چې د خپل ځان او کورنیو د خوندیتوب لپاره واکسین وکړي او له دې وژونکې ناروغۍ په امن شي.
ورپسې د شهید استاد رباني د ښوونې او روزنې پوهنتون په څلورو جلا ځایونو کې د پوهنتون محصلانو، استادانو او کارکوونکو ته د کرونا د واکسین تطبیق پیل شو او تر یوې اونۍ پورې به دوام وکړي.
